Category: Ikke kategoriseret

Góða fundarfólk, góðu áhoyrarar!

Svanur hevur nú lagt 12 ár aftur um seg. 2020 hevur verið eitt serligt ár. Eitt ár, vit koma at minnast sum nakað heilt serligt, har Covid-19 nærum setti dagsskránna. Hóast avbjóðingar hava verið, so hevur felagið víst vilja og áræði, og tey regluligu tiltøkini hava verið so gott sum alt árið 2020. Bæði boccia, fótbóltur og svimjing  hava koyrt nærum óávirkað, og vil eg takka fyri ágrýtnið, ið okkara venjarar hava víst.

Sum nevnt var undanfarna ár eitt serligt ár við avmarkaðum tiltøkum, og tí ikki líka hendingaríkt sum 2019, sum var eitt ár, har vit fingu gleði at hátíðarhalda okkara 10 ára føðingardag. Men tó hava onkrar kappingar verið. 

Mánadagin 23. november var skipað fyri árligu jóla svimjikappingini hjá Parasport og Kvøldskúlanum í Havn. Vegna tilmælini var ikki gjørt líka nógv burturúr hesaferð, men tó høvdu 26 svimjarar meldað seg til. Her stóðu vit okkum væl, og fingu fleiri heiðursmerki heim. So vit kunna gleðast um tað menning, sum er farin fram, síðan skipað svimjing er komin upp at standa. Svimjitilboðið í Leirvík er vónandi komið fyri at vera.

Hósdagin 10. desember  var borðtenniskapping í fimleikarhøllini á Frælsinum í Havn. Hetta er ein afturvendandi kapping hjá Parasport, har eisini leikarar hjá Svani vóru við.

Nú vit eru byrjað uppá 2021, vóna vit, at fleiri tiltøk kunnu vera, men hetta má tíðin koma at vísa. Trúgvi fleiri sakna okkara árligu Svanacup kapping, sum bæði er spennandi og hugnalig. 

Eisini hava tær lokalu boccia-kappingarnar verið. Hesar vera endaliga avgreiddar seinni í ár. Vanliga eru hesar kappingar bæði hugnaligar og spennandi.

Felagið roynir framhaldandi at hyggja eftir nýggjum ítróttargreinum, og er ein av hesum hondbóltur. Hondbóltur var á skrá ein vetur, men ikki nokk av luttakarum vóru til, at vit kundu halda fram. Vit kenna frá øðrum ítróttargreinum, at tað tekur tíð at fáa eina ítróttargrein at hanga við. Vilja royna aftur komandi vetur, um ikki tað kann bera til at fáa hesa ítróttargrein at verða ein part av skránni hjá Svani.

Til seinast vil eg takka nevnd, limum, venjarum og øllum tykkum, sum eru við til at geva eina hjálpandi hond.

Takk øll somul!

Hendrik Olsen, Nevndarformaður í  Svani

Eli og Elvin hava í kvøld vunnið Svani heiðursmerki í svimjing.

Teir gjørdust nummar 3 í hvør sínum bólki bæði í 25m og 50m svimjing í Skemman Open svimjikappingini, sum Parasport Føroyar skipaði fyri í Svimjihøllini í Gundadali.

Kappingin var ein sonevnd Special Olympics kapping.

Vit ynskja Elvin og Eli hjartaliga tillukku við heiðursmerkjunum.

Fyrsta umfar av boccia grand prix varð leikt í fimleikahøllini á Glyvrum mikudagin. 22 luttakarar vóru, og tað er sera gott. Fleiri nýggj andlit vóru at síggja, og so onkur gamal kenningur. Deiligt at síggja so nógv.
Úrslitið gjørdist, at Eli vann fyrstu kappingina og hevur harvið lagt seg á odda við fyrstu 10 stigunum. Rannvá gjørdist nummar tvey og René nummar trý.
Hesaferð megnaðu bæði Ann, Magni, Rúna og Kristian at spæla seg víðari til fjórðingsfinaluna, og fingu tey hvør 5 stig fyri tað.
Annað umfar verður leikt fyri jól.

Nú mikudagin, 18.novembur, er fyrst umfar av boccia grand prix á skránni. Vit møtast øll, tess fleiri tess betri, í fimleikahøllini í Glyvra skúla og byrja stundisliga klokkan 16:00.

Hetta er fyrsta kapping síðani í vár, og vit gleða okkum øll. Ætlandi skulu 4 umfør leikast hendan veturin. Vinnarin fær 10 stig, nummar tvey fær 9 stig og soleiðis niðureftir. Fyri at luttaka fær ein tó altíð tvey stig. Tá fjórða umfar er avgreitt, verður talt upp, og vinnarin verður funnin.

Í vár endaðu vit heldur brádliga, tá korona kom á vitjan. Vit fingu tó leikt trý umfør, og fyrsti vinnarin av nýggja steypinum gjørdist Eli Olsen. Hann hevur tí steypið í varðveitslu til einaferð móti vári.

Vit síggjast mikudagin.

Ársins útgáva av Boccia Grand Prix fekk ein bráðan enda. Eftir skránni skuldu 4 umfør leikast, men tá korona tók okkum øll av fótum, var neyðugt at steðga eftir 3. umfar. Tó hevur hetta kappingarárið verið sera spennandi og áhugavert. Nýggjur leikari hevur lagt seg út í kappingina, har leikarar sum Joannu, René, Ísaki og Elvin annars hava skarað framúr. Ungi Eli Olsen hevur í ár verið sera nærlagdur og hevur hugsavnað seg í spælinum. Tað hevur eisini givið úrslit, tí av teimum trimum umførunum, sum blivu leikt, hevur Eli vunnið tvey tey síðstu, og tí er tað eisini uppiborið, at hann vinnur kappingina í ár.

Í vikuni fekk Eli so handað steypið. Talan er um nýtt steyp, sum leikast skal um komandi tíggju árini. Í 2010 fóru vit undir at leika um eitt steyp, sum René hevur vunnið oftast í tíggju ár, og tí fekk hann steypið til ognar. Nú hevur so Eli vunnið fyrsta partabrævið í nýggja steypinum, sum altso verður spælt um komandi tíggju árini.

Takk fyri í árið, sum fekk so bráðan enda. Vit síggjast aftur í heyst. Um støðan við korona broytist, so kunnu vit royna at skipa fyri onkrari kapping í summar. Vit fáa at síggja.

Gott summar!

Jóhan og Dan

Svanur vil ynskja Parasport Føroyar tillukku við tí stóra runda degnum – 40 ára!

Tann 10. apríl eru 40 ár liðin, síðan ítróttasambandið fyri brekað, ÍSB, varð stovnað. Í dag kallast sersambandið Parasport Føroyar.

Vit í Svani vilja takka fyri alla tann stuðul Parasport Føroyar er við til at veita felagnum . Vit síggja fram til eitt framhaldandi spennandi og ikki minst mennandi samarbeiði framyvir.

Heilsan

Svanur

Triðja umfar í boccia grand prix gjørdist seinasta umfar í ár. Vanliga verða fýra umfør leikt, men í ár steðgar allur skúli og øll ítróttatiltøk nú, og tí verður úrslitið eftir triðja umfar endaliga úrslitið.

Hetta hevur verið árið hjá Eli. Í fyrst umfarinum vann hann 5 stig, tá hann megnaði at leika seg í fjórðingsfinaluna. Síðani hevur Eli verið hugagóður og nærlagdur til venjing. Hann hevur lagt nógv fyri. Hetta hevur hann eisini fingið gagn av, tí fleiri ferðir hevur hann vunnið, tá vit hava verið til boccia á kvøldskúlanum.

Seinastu tvey umførini í boccia grand prix hevur Eli ongna iva verið um, at hann er besti boccialeikari í Svani hendan veturin. Hann hevur vunnið báðar tær seinastu kappingarnar greitt. Tí endaði hann, nú vit enda kappingina, á fremsta plássi við 25 stigum. Nummar tvey gjørdist René við 21 stigum.

Hjartaliga til lukku Eli. Takk fyri í ár øll somul.

Mánakvøldið 10. februar var ársaðalfundur felagsins á Verkstaðnum Stíggjur í Saltangará. Jastrid Weihe var vald til fundarstjóra, og skipaði fundin eftir lýstu skránni: Formansfrágreiðing, framløga av roknskapi og fíggjarstøðu til góðkenningar, val av nevndarlimum, val av grannskoðara, innkomin mál og til seinast bleiv tosað um ymiskt saman við luttakarunum á fundinum.

Formansfrágreiðingin liggur her

Hendrik Olsen og Anna Gaardlykke stóðu fyri vali og stillaðu bæði upp aftur. Godwin Sunder var eykalimur og stillaði eisini upp aftur. Einki mótvalevni var.

Nevndin skipaði seg á fundi beint eftir aðalfundin. Hendrik Olsen formaður, Anna Gaardlykke næstforkvinna og skrivari, Erla Weihe Johannesen kassameistari, Sonja Reinert Norðgerð og Páll Hammer eru nevndarlimir og Godwin Sunder er eykalimur.