Spenningurin í hásæti í boccia grand prix

Tað er lagt upp til tað heilt stóru finaluna, tá fjórða og seinasta umfar av boccia grand prix verður leikt um nakrar fáar vikur. Mikudagin varð næstseinasta umfar lagt, og úrslitini háttaðu seg soleiðis, at spenningurin hevur ongantíð verið størri enn júst nú.

Eftir innleiðandi umfarið mikudagin var greitt, at fleiri leikarar høvdu klárað seg betur enn ofta áður. Pauli, Heri, Gunnar og Eli stóðu í fjórðingsfinaluni. Eli fór allan vegin og leikti sjálva finaluna móti Elvin. Har vísti Elvin tó, at hann er ein góður boccialeikari. Í eini spennandi og taktiskari finalu basti hann Eli og vann umfarið og 10 týdningarmikil stig.
Nú er støðan spent. Elvin og René liggja á odda við 26 stigum hvør. Beint í hølunum kemur Ísak við 24 stigum.
Tað verður spennandi at fylgja við, hvør fer at vinna kappingina.
Og tað er ikki líkamikið, hvør vinnur. Steypurin, sum fyrstu ferð varð leiktur um í 2010, kann verða vunnin til ognar. Tað skuldu nemliga leikast um steypin í 10 ár. Tann, sum tá hevði vunnið oftast, skuldi eiga steypin. René er einasti leikari, sum hevur vunnið steypin meira enn eina ferð. Hann hevur vunnið tvær ferðir. Vinnur René kappingina, so fær hann steypin til ognar. Vinna Elvin ella Ísak, so mugu vit leika um steypin minst eitt ár afturat. Spennandi!
Onnur tíðindi