René á odda eftir fyrsta umfar

Fyrsta umfar av Boccia Grand Prix varð leikt í Glyvra skúla mánakvøldið. 17 luttakarar møttu. Nevnast kann, at Jákup Andrias, Ann og Jørgen av Vollanum vóru ikki við á hesum sinni. Tey vóna vit at síggja aftur til kapping.

René var komin úr Klaksvík. Og tað var ein skilagóð avgerð. René gjørdist vinnari av fyrsta umfarinum og hevur harvið lagt seg á odda í kappingini við 10 stigum.

Í finaluni møtti hann Elvini, sum hevði vunnið fleiri dystir í síðstu løtu. Í finaluni vann René greitt. Tað var annars um reppið, at René als ikki kom í finaluna. Í hálvfinaluni móti Eli stóð René til at tapa, men at enda vann hann við brotskasti.

Næsta kapping verður longu mikudagin kl 16:00 í Glyvra skúla.

Fyrsta umfar av Boccia Grand Prix á skránni

Jólaborðhald

Árliga jólaborðhaldið hjá Svani verður í Leirvík mikudagin 5. desembur.

Vit byrja við at bovla kl 18, og aftaná fara vit at fáa okkum ein betri bita, syngja og hugna okkum.

Tey, ið ynskja at koma við, skulu siga frá áðrenn 3 desembur til Annu Gaardlykke á tlf 592027, ella senda ein mail til svanur@svanur.fo

Kostnaðurin er 300 kr, og tit gjalda, tá tit møta.

Vit gleða okkum at síggja tykkum og vóna at fáa eina hugnaliga og stuttliga løtu saman.

Vinarliga

Nevndin

Væl eydnað Svanacup

Eina ferð um árið er Svanacup á skránni. Aftur í ár var dagurin hildin í skúlanum við Løkin í Runavík. Boccia var í Løkshøll, meðan matarsalurin var matarsalur.

Kappast varð í trimum bólkum. Menn við menningartarni og kvinnur við menningartarni kappaðust í hvør sínum bólki. Hjá kvinnunum vann Meiken, meðan Hilda gjørdist nummar tvey. Rúna vann bronsuna, tá hon vann seinasta dystin móti Joannu, sum tískil gjørdist nummar fýra.

Hjá monnunum eydnaðist Ísaki at vinna gull. Tað var eftir, at hann hevði vunnið eina spennandi finalu móti Elvini, at hann kundi kalla seg vinnara av Svanacup 2018. Elvin gjørdist nummar tvey, og gamli kenningurin René vann bronsuna.

Aftur í ár var ein opin bólkur. Her kundu øll, sum høvdu hug, royna seg í kapping. 11 tóku avbjóðingina og fingu eina frálíka kapping. Jensina vann, Dinna gjørdist nummar tvey og Bárður nummar trý.

Um tvær vikur byrja kvøldskúlarnir sítt virksemi. Tá bara bocciabóltarnir aftur á rull, og tað verður spennandi at fylgja við, hvussu tað fer at ganga.

Svana cup mánadagin 8 oktobur

Svana cup í Løkshøll 8 okt.

Svanur, sum er eitt ítróttarfelag fyri fólk við rørslu- og menningartarni í Eysturoy, hevur tey seinastu níggju árini skipað fyri einari cupkapping í boccia, ið kallast Svana-cup. Henda kappingin verður í Løkshøll í Runavík mánadagin 08. oktobur kl. 16.00.

Kappast verður í boccia fyri rørslu- og menningartarnað. Boccia er eitt bóltspæl, sum er sera spennandi, og sum øll kunnu vera við í uttan mun til aldur, stødd og fysisk evni. Tað eru tveir luttakarar í Boccia í hvørjum spæli, og endamálið er at kasta sínar bóltar so tætt upp at málbóltinum, sum til ber. 13 bóltar eru við í spælinum: 6 bláir, 6 reyðir og 1 hvítur málbóltur.

Í nøkur ár hava vit valt at hava eina kapping fyri áskoðararnar eisini, har tey, sum annars kappast, leggja lag á. Hetta er sera spennandi og skemtingarsamt bæði fyri brúkarar og áskoðarar. Á skránni í ár vera fýra kappingar:

1. Kvinnur við menningartarni

2. Menn við menningartarni

3. Kvinnur og menn við rørslutarni

4. Áskoðarar

Torbjørn Jacobsen, borgarstjóri í Runavíkar kommunu, fer at seta tiltakið. Eftir setanina verður kappast, og nr. 1, 2 og 3 í hvørjari kapping fáa heiðursmerki.

Vit miðað ímóti at fáa eina hugnaliga løtu við síðuna av kappingina eisini, har okkurt gott verður at fáa.

Øll eru hjartaliga vælkomin

Svanacup 2018 – WAW

Vit koma at lýsa nærri við hvat verður á skrá – gleðig tykkum!!!

Stuttligt fótbóltstiltak á Tórsvølli

Sunnudagin 30. september skipa Parasport og FSF fyri stuttligum fótbóltstiltaki á Tórsvølli.

Tiltakið er til fólk við menningartarni og vinum, ella familju teirra.

Á tiltakinum verða stuttligar kappingar til børn og vaksin, og allir luttakarar við menningartarni fáa lekkra t-troyggju og bólt.

Fyri at vit skulu vita hvussu nógv koma er neyðugt at melda til á https://goo.gl/forms/JFwBS1urItYMzu502

Seinasta freist at boða frá luttøku er fríggjadagin 28. September kl 12.

Parasport og FSF vóna at síggja nógv, og onkur nýggj andlit á Tórsvølli 30. September.

Joanna og Eli vunnu í mentanarvikuni

Í sambandi við mentanarvikuna í Runavíkar Kommunu skipaði Svanur fyri opnari bocciakapping. Tað merkir, at øll, sum hava hug at spæla boccia, kunnu luttaka. Fleiri enn 20 leikarar vóru við at gera eina spennandi og væl leikta kapping.

Í bólkinum við kvinnum vóru flestu leikararnir. Endin gjørdist tó, at mest vinnandi kvinnan seinastu árini, Joanna Poulsen, vann kappingina. Finaluna vann hon 2-1 á Kristinu, sum royndi seg fyri fyrstu ferð.

Hjá monnunum fingu vit ein heilt nýggjan vinnara. Eli hevur verið við í mong ár, og hesaferð eydnaðist honum at fara allan vegin og vinna gull. Eli vann allar sínar dystir í dag.

Úrslitini:

Kvinnur

1. Joanna

2. Kristina

3. Marta

Menn

1. Eli

2. Gunnar

3. Kristian

Ísak vann Boccia Grand Prix

Í sambandi við, at kvøldskúlaárið hjá Runavíkar Kvøld- og Ungdómsskúla endaði, varð skipað fyri framsýning í Løkshøll og bocciakapping úti á gongini. Talan var um fjórða umfar av Boccia Grand Prix.

Undan kappingini var støðan tann, at Ísakur lá á odda, eitt stig framman fyri Elvin. Eisini høvdu Elin og Joanna ein møguleika at vinna kappingina, men tá skuldi alt ganga upp í eina hægri eind.

Sum ein “jokari” luttók eisini Gunnar hesaferð.

Og júst Gunnar var stóra yvirraskilsi, tí tað eydnaðist honum at vinna seg heilt í finaluna, sum hann tó tapti móti stóra leikaranum og vinnaranum hetta kappingarárið, Ísaki Hansen.

Elvin endaði nummar trý í hesi kappingini og nummar tvey samanlagt.

Nummar trý í Boccia Grand Prix gjørdist Elin.

Takk fyri eitt frálíkt kappingarár. Góða summarferiu.

3. umfar leikt, og Ísakur hevur lagt seg á odda

Tað skuldi vera seinasta umfar, men avrátt varð, áðrenn farið varð í gongd, at 4. umfar eisini skal leikast. Tað verður leikt í skúlanum við Løkin leygardagin 17. mars kl. 14. Tað er beint eftir, at kvøldskúlaframsýningin er sett.

Og tað gjørdist eitt spennandi umfar mikudagin. Elin gjørdi tað aftur væl, tá hon leikti seg í fjórðingsfinaluna. Tað eydnaðist henni tó ikki at vinna seg í hálvfinaluna. Hon hevur tó enn møguleikan at vinna heiðursmerki í samlaðu kappingini.

Ein, sum veruliga vísti, hvør dugur er í honum, var Jacob. Hann spældi væl og vann seg heilt í hálvfinaluna, sum hann tó tapti tepurt móti Elvini. Í dystinum um triðja plássið eydnaðist tað Jacobi at vinna móti Joannu, sum annars hevur steypið í varveitslu til leygardagin, tí hon vann kappingina í fjør.

Finaludysturin stóð millum Ísak og Elvin. Eftir 2. umfar lógu teir báðir púra javnir á 17 stigum hvør, so hetta var ein avgerandi dystur. Her vísti Ísakur klassa og vann 4-0 og harvið legði hann 10 stig afturat sínum 17. Ísakur er tí á odda við 27 stigum, áðrenn seinasta umfar, sum altso verður leikt leygardagin. Júst leygardagin fyllir Ísakur 24 ár, so tá er høvi at ogna sær eina rimmar føðingardagsgávu.